ఓటరు నమోదుకు మరో అవకాశం.. అక్టోబర్ 15, 16 తేదీల్లో ప్రత్యేక శిబిరాలు
18 ఏళ్లు నిండిన యువత ఫారం-6తో దరఖాస్తు చేసుకోవాలి
హైదరాబాద్, అక్టోబర్ 14 (విజయ కెరటం): తెలంగాణలో కొత్త ఓటర్ల నమోదు, ఓటర్ల జాబితాలో పేర్ల సవరణ కోసం ఎన్నికల సంఘం ప్రత్యేక శిబిరాలను నిర్వహించనుంది. ఈ నెల 15, 16 తేదీల్లో రాష్ట్రవ్యాప్తంగా ఓటరు నమోదు శిబిరాలు ఏర్పాటు చేయనున్నట్లు రాష్ట్ర ప్రధాన ఎన్నికల అధికారి సుదర్శన్ రెడ్డి వెల్లడించారు.
కొత్తగా 18 ఏళ్లు నిండిన యువతతో పాటు, ముసాయిదా ఓటర్ల జాబితాలో పేర్లు లేని అర్హులైన వారు ఈ అవకాశాన్ని సద్వినియోగం చేసుకోవాలని ఆయన సూచించారు. ఓటు హక్కు పొందేందుకు ఫారం-6 ద్వారా దరఖాస్తు చేసుకోవాలని తెలిపారు.
- ప్రత్యేక శిబిరాల్లో అందిన దరఖాస్తులను పరిశీలించి అర్హులైన వారి పేర్లను నవంబర్ 9న విడుదల చేయనున్న తుది ఓటర్ల జాబితాలో చేర్చనున్నట్లు సీఈవో పేర్కొన్నారు. అర్హులైన ప్రతి ఒక్కరూ తమ ఓటు హక్కును నమోదు చేసుకోవాలని ఆయన విజ్ఞప్తి చేశారు.
